___
Të nderuar familjarë, shokë dhe shoqe-Të dashur qytetarë të Prishtinës,
Me shumë përgjegjësi dhe përkushtim kam vendosur të kandidoj për Asamblenë e Komunës së Prishtinës. Ky vendim nuk ishte i lehtë, por është i sinqertë – i lindur nga dëshira që të jap kontributin tim për qytetin tonë dhe për të ardhmen e gjeneratave që po rriten këtu.
Unë jam eksperte e turizmit, një fushë ku Kosova dhe sidomos Prishtina ka potencial të jashtëzakonshëm. Turizmi dhe zhvillimi i shërbimeve jo vetëm që krijojnë mundësi pune, por i japin kryeqytetit tonë një identitet më të fortë, duke e bërë më atraktiv për vizitorë dhe më të dashur për banorët. Besoj se me politikat e duhura, Prishtina mund të shndërrohet në një model të qytetit mikpritës, modern dhe të organizuar.
Por përveç profesionit tim, jam edhe nënë vetushqyese. Nga përvoja personale e di sa të mëdha janë sfidat e përditshme për shumë familje në kryeqytet: mungesa e çerdheve e kopshteve cilësore, mungesa e hapësirave publike për fëmijë, transporti i dobët, shërbimet komunale që shpesh nuk i përgjigjen nevojave tona. Prandaj, kandidatura ime është një zë për familjet, për fëmijët, për të rinjtë dhe për ata që kërkojnë kushte më të mira për jetesë në Prishtinë.
Vizioni im është i qartë:Një Prishtinë më mikpritëse – me infrastrukturë dhe shërbime që e bëjnë qytetin më të hapur për vizitorë dhe më të rehatshëm për banorët.
Një Prishtinë më sociale – me më shumë përkujdesje për fëmijët, familjet dhe kategoritë që kanë nevojë për mbështetje.
Një Prishtinë e gjallë – me më shumë hapësira kulturore, gjelbërim dhe aktivitete që e pasurojnë jetën e qytetit.
Ky është premtimi im: të jem një zë i fuqishëm në Asamble për qytetarët e Prishtinës.
Ju ftoj të më bashkoheni në këtë rrugëtim dhe të më përkrahni në misionin për një Prishtinë më të drejtë, më të zhvilluar dhe më të jetueshme për të gjithë ne.Per të gjithë ju qe do të me besoni votën tuaj, unë mbaj numrin 25 dhe jam anëtare e PSD-së.
#25 Fuqia e ndryshimit!
