Komuna e Gllogovcit (Drenasit) në Hartën e Kosovës

Zeqir Bekolli, Drenas

Kohët e fundit, disa nga komunat e Kosovës po ankohen se përmbaruesit kanë marrë mjete nga buxhetet komunale. Ankuesit e shohin këtë si një problem të jashtëm, duke e fajësuar dikë tjetër, ndonëse e dinë, ose nuk e dinë, se ata vetë janë përgjegjës.

Arsyeja qëndron në faktin se komunat, gjatë planifikimit të buxheteve, nuk kanë paraparë me kohë obligimet ligjore që kanë ndaj të tretëve, përfshirë edhe Kontratën Kolektive të nënshkruar ndërmjet Qeverisë, Sindikatës dhe Odës Ekonomike. Nëse komunat do t’i kishin paraparë këto obligime në buxhetet e tyre, Qeveria do të kishte qenë e detyruar t’i ndajë mjetet për detyrimet që lidhen me Kontratën Kolektive, qofshin ato për shujta ushqimore ose për shpenzime të udhëtimit.

Megjithatë, në mungesë të këtij planifikimi, komunat po penalizohen, për shkak se, për shkaqe që mund të jenë mosdije ose qëllim, ato nuk i kanë paraparë këto obligime në buxhet. Si pasojë, kur punëtorët ankues fitojnë proceset gjyqësore, përmbaruesit tërheqin mjete nga buxhetet e komunave. Një njohës i mirë i këtij problemi thekson se ky fenomen është përfituar edhe nga zhvatësit e buxhetit, duke krijuar një rrjet të lidhur mes avokatëve, përmbaruesve dhe zyrtarëve komunalë, çka kërkon një hetim të thelluar nga organet e drejtësisë.