Zeqir Bekolli, Prishtinë
____
Ju që nënshkruan Asociacionin dhe ju që po kërkoni themelimin dhe që nuk jeni kundër tij, një gjë duhet ta keni të qartë se kjo kërkesë serbe nuk është asgjë tjetër por tendencë për krijimin e një hapësire ruse në Kosovë.
Në Bosnje, me pastrim etnik dhe nën trysni ndërkombëtare, u krijua OJQ- ja e njohur si Republika Serbe e cila shumë shpejtë u shndërrua në një minishtet në shtet, me orjentim të qartë kah Rusia, ose një lloj oaze e ndikimit rus atje.
Një lloj loje përfide në këtë drejtim është duke e luajtur edhe Serbia, pasi nuk mundi ta pastrojë etnikisht Kosovën me luftë. Tashmë ajo iu ka kthyer metodës, siç veproi me serbët e Bosnjes. Këtë gjë duhet ta kenë parasysh institucionet përgjegjëse, Qeveria dhe Kuvendi dhe të mos lejojnë në asnjë mënyrë të formojnë një krijesë njëetnike dhe Kosovën ta shndërgojnë në mjedis të dy etnive, që është edhe në kundërshtim me Kushtetutën e vendit, por edhe rrezik për bosnjëzim.
Deri sa Kosova është themeluar dhe pranuar si shtet multietnik, nga një Asociacion ekzistues i komunave, t’i formojë tri asociacione ose bashkësi me status të OJQ-ve. Bashkësia e parë ose nr. 1 t’i përfshinë komunat: Skenderaj, Vushtrri, Obiliq, Podujevë,Mitrovicë dhe komunat me shumicë serbe.
Bashkësia nr. 2 t’i përfshijë komunat: Prishtinë, Fushë-Kosovë, Lypianin, Ferizajin, Gjilanin, Viti, Kamenicë dhe komunat me shumicë serbe. Ndërsa Bashkësia nr.3 t’i përfshinë: Drenasin, Malishevën, Suharekën, Klinën, Rahovecin, Prizrenin, Gjakovën, Pejën, Istogun dhe Dragashin dhe pakicat që veprojnë në këto hapsira.
Ky lloj konfiguracion do ta mbronte sistemin multietnik të Kosovës, do të jetë në harmoni me Kushtetutën e vendit dhe do të krijonte rrethana për stabilitet, siguri dhe integrim.
Që të realizohet një propozim i tillë, Qeveria dhe Kuvendi i Republikës duhet sa më parë t’i përgatisin plotësim- ndryshimet e ligjit për organizimin territorial dhe të dalin me propozimin konkret.
