Imzot Gjergj Koleci lindi në Kallmet (Rrethi i Shkodres) në vitin 1868. Mësimet e para i mori në Kallmet pranë rezidencës ipeshkvnore. Ka kryer studimet në Kolegjin Papnor Urban të Propagandës në Romë. Shërbeu si famullitar në famullitë e Mirditës, si në: Kalivar, Qafëmali, etj.
Gjatë kësaj kohe Abati i Mirditës, Prend Doçi i jepte vlerësime të mëdha në relacionet drejtuar Propagandës Fide, për të cilën ai shkruante: “Është gjithë jetë dhe ambicioz per te ece perpara, dhe të jep shpresa që do të jëtë një instrument shumë i mirë në duart e Selisë së Shenjtë për të mirën e kësaj province të varfër të krishterë”.
Imzot Gjergj Koleci ka një sjellje shembullore dhe bën që populli ta dojë: Në vitin 1911 në katedralen e Shkodrës u shugurua ipeshkëv i Sapës së bashku me Imzot Luigj Bumçin që u shugurua ipeshkëv i Lezhës.
Imzot Koleci u bë një nga figurat kryesore të aktivitetit për liri dhe pavarësi nga pushtimi shekullor osman. Mori pjesë dhe ishte organizator i shumë kuvendeve siç ishte kuvendi i Kallmetit, Rrubikut etj dhe takimeve të ndryshmë së bashku me Imzot Luigj Bumçin, me qëllim nxitjen e popullit të krahinave veriore të Shqipërisë për t’u ngritur kundër pushtuesve osmanë dhe me pas kundër atyre serbe e malazeze. Imzot Koleci u bë pjesë e shoqërisë “Bashkimi”, ku dha kontributin e tij të çmueshëm në hartimin dhe botimin e shumë veprave të rëndësishmë të kësaj shoqërie.
Pas një jete dedikuar fesë dhe atdheut, Imzot Gjergj Koleci fjeti në vitin 1928.
