nga: Zeqir Bekolli
Adem Hoxha 70 vjeçarë, i pensionuar para pesë vitesh, nuk ndalet. Pasi kreu me ndershmëri zanatin e punëtorit teknik në gjimnazin “Gjergj Kastrioti Skënderbeu” në Drenas, iu rrek bujqësisë. Fillimisht i kishte disa krerë lopë, kurse sot në fermen e tij, tok me viçat i ka 23 krerë . Edhe pse në moshë ai vazhdon të kujdeset për kopenë e tij, si nëpër kullota, ashtu edhe gjatë qëndrimit në shtallë dhe për këtë nuk ndien fare lodhje.
Në fshat, nëpër shtëpitë tjera, kafshët janë rralluar. Por në lagjen Dobërdolani, vëllezërit Naser dhe Hamëz Dobërdolani po ashtu kanë një fermë më afro 20 krerë lopë. Kjo ekonomi familjare të dy familjeve iu sjell të ardhura për ta bërë një jetë të mirë.
Doemos se për kafshët nevojitet një përkujdesje, por Ademi dhe vëllezërit Dobërdolani vazhdojnë të përkujdesën për fermat e tyre, prej të cilave edhe përfitojnë.
Shembulli i tyre flet qartë se me një angazhim të mirë edhe në fshat mund të jetohet mirë dhe me leverdi, pa pasur nevojë me lëshuar vendlindjen.
