Léa ime, lamtumirë! 

Bajram Sefaj, shkrimtar, Prishtinë

Poezi elegjiake

Lamtumirë,  

Léa ime, lamtumirë! 

(Me rastin trishtues të shuarjes së bijës së tim bir, Léa-s. Ndërroi jetë sot, vetëm disa ditë, para se t’i gëzonte 19 Pranvera!).  

***

Gjyshi yt, i pikëlluar, përjetësisht. (Bajram Sefaj)

Allez Les Bleus, Allez Les Bleus! 

ulur, galuc,  

si sumbull 

mbi shtratin e 

gjyshit 

mërgimtar 

në dhomën  

bosh 

të shkretë fare, 

pa asnjë orendi 

pos, në një qoshe, 

skutë të saj, 

zhurmonte  

një televizor i moçëm  

si i pa mushkëri… 

transmetonte  

një ndeshje futbolli, 

si betejë të ashpër 

gladiatorësh, 

në Arenë! 

Ti, kthyer me fytyrë  

nga muri memec,  

e harruar krejt, 

pas një loje, të pa brenga, 

fëmijerie  

thurje një melodi 

për trazim shpendësh 

që asnjëherë më nuk do të vijë 

Allez Les Bleus, Allez Les Bleus 

pa e ndjerë 

(larg qoftë!) 

se kjo do të jetë, 

melodi gjëme 

e fundme nga 

Ti,  

Léa, bija ime, 

Léa ime! 

Lamtumirë  

PIKË… 

PIKËllim,  

PIKEllim, 

PIKËllim…  

Prishtinë, 30 gusht 2023