Kolonel Rustem Berisha, Komandant i Luftës të Koshares
Idriz Zeqiraj, Gjermani
_____
(Vijon nga “Dhjerësit e vlerave të luftës, shantazhojnë shtetin”)
_____
Për habinë e të gjithë atyre që e njohin Komandantin e Luftës të Koshares, Kolonel Rrustem Berisha, emri i tij figuron në listën e Komisionit të penalizuar, akuzuar për falsifikimin e “Dëshmisë të Veteranit”!? Ai nuk e ka vendin në -bankë e zezë”, përkrah falsifikatorëve. Lufta ballore e Koshares ka pasur komandë të mirëfilltë ushtarake të organizuar. Ekziston lista emërore pranuese e luftëtarëve, me identitetin e saktë të secilit ushtar-luftëtar. Nuk ka pasur asnjë mundësi falsifikimi dhe janë të verifikueshëm në çdo kohë, Sektori -Lufta e Koshares-, në Arkivin shtetëror.
Prandaj, e inkurajoj Kolonel Rrustem Berishën, të kërkojë sqarim-llogari nga Prokuroria, se mbi ç`bazë është ngritur akt-akuza kundër tij?!
Kolonel Berisha duhet të veçohet nga kjo listë e ndotur, sepse Koloneli ka dhënë prova se nuk merret me pisllëqe të tilla. Dhe kjo bëhet qëllimshëm, jo vetëm për ta dëmtuar imazhin e tij personal, por edhe të luftëtarëve të tij dhe Luftën e Koshares, në përgjithësi. Aludimi është i qartë: “Edhe Kosharja ka prodhuar “veteranë” të rrejshëm!” Por, kjo demantohet lehtësisht, pasi dokumentacioni me identitet e ushtarëve, hyrjet datore në Komandë, është ruajtur në plotëni në Arkivin Komandës të Koshares. Njëherësh, edhe Shoqata e luftëtarëve të Koshares, duhet të kërkojë sqarim, pse është penalizuar Kolonel Berisha?!
Mendoj se futja në një listë me Komisionin skajshëm të përfolur, për falsifikime groteske, të “Dëshmive të Veteranëve”, të Kolonel Berishës, ka qenë e qëllimshme, ngaqë hileqarët, profiterët e luftës, janë të njohur për marifetllëqe të tilla. Madje, historia e afërt ka dëshmuar, se për ta përvetësuar luftën dhe betejat e pabëra, janë shuar shumë jetë komandantësh të shquar të FARK-ut të Dr. Ibrahim Rugovës.
Këta kallës të Flamujve të Dardanisë, shumë syresh janë të penalizuar dhe dëshmitarë në gjyqin e Hagës, me akuzën si Ndëmarrje e Përbashkët Kriminale. Kur belbëzonin, përgjatë dëshmive të tyre, kryetari i Gjyqit i siguronte, “flisni lirshëm, se nuk do t`ju arrestojmë!” Pra, secili prej tyre ishte dhe është kandidat për hekura, për të “bëmat” e tyre kriminale gjatë dhe pas luftës.
Lufta e Koshares, por jo beteja e Koshares, siç e ngatërrojnë disa të painformuar mjaftueshëm. Ajo nuk është betejë në njëjës, por varg betejash, në shumës, të cilat përbëjnë Luftën e Koshares. Gjeneral Agim Çeku, dikur, në cilësinë e kryeministrit, nga tribuna e Koshares, në mes tjerash, ka pranuar se “Lufta e Koshares legjitimoi Luftën Çlirimtare të Kosovës”. Ajo vlerësohet si emblema e të gjithë Luftës të Kosovës.
Luftë ballore në Drenicë, e udhëhequr nga tribunët popullorë, Shaban Polluzha e Mehmet Gradica, me luftëtarët nacionalistë dhe Lufta ballore e Koshares, kanë ngjashmëri. Ato janë dy luftat të vetme, në historinë shqiptare, të cilat llogaritën fitimtare, në raport me forcat ushtarake, të palëve ndërluftuese, sepse numri i luftëtarëve të vrarë, ishte i balancuar.
OVL e PAN-it, gjithëherë kanë minimizuar Luftën e Kosharës, madje deri në mohimin e saj. Komisioni i penalizuar faktueshëm, për falsifikimin e listave të veteranëve, kundërshtonin pranimin e luftëtarëve të Kosharës si veteranë të luftës?!
Armiqësia e krerëve dhe të eksponentëve të OVL, përkatësisht, të PAN-it, ishte dhe mbetet aq e hapur dhe inatçore, ndaj luftëtarëve të Koshares, sa që fletë-arresti i parë ushtarak, i lëshuar nga Shtabi, ishte pikërisht për Heroin më markant të Luftës të Kosovës, Sali Çekaj!!
Shumë nga luftëtarët e Koshares ishin luftëtarë në Dukagjin, nën komandën e Kolonel Tahir Zemaj. Ata kanë Shoqatën e tyre të veteranëve dhe nuk janë pjesë e OVL të sotme, zhurmuese e shantazhuese të shtetit të Kosovës! Sepse krerët dhe eksponentët e saj kanë qenë dhe mbeten militantë të tërbuar të PAN-it, të cilët janë implikuar dhe kriminalizuar në kidnapime, maltretime deri në vrasjen e kundërshtarëve politikë.
Kujtoni kalvarin e -Brigadës Mërgimi- të Kolonel Tahir Zemaj, të cilët u maltretuan në rrugën për në Koshare. Ata u kthyen dhunshëm në Tropojë, në rrugën për në Koshare, duke u kthyer në Kukës, respektivisht, në kufirin e Morinit, u çarmatosën nga bandat e uniformuara të Dukagjinit në Prizren, Gjakovë dhe në Pejë! Përgjatë gjithë rrugëtimit, u ndaluan, u kontrolluan, u rrahën, u plaçkitën, u zhveshën, u poshtëruan në mënyrë më kriminale, sa që turpërohet çdo shqiptar, që ata banditër të janë pjesë e kombit! Megjithatë, këta mujsharë e dajakxhinj, janë kuadro dhe “veteranë” të luftës!
Djemtë luftëtarë, të maltretuar, të dërrmuar nga dajaku banditesk, u dërguan ke Prefekti i Pejës, Et`hem Çeku, i cili urdhëroi t`i dorëzohen Shtabit të Dukagjinit. Asaj nate të zezë, komandantët e tyre u maltretuan deri në mbytje në malet e Ratishit të Deçanit. Këtë kalvar e ka përshkruar me besnikëri të madhe, Komandanti i -Betejes fitimtare të Loxhës- , Kolonel Tahir Zemaj, në librin “Kështu foli Tahir Zemaj”, me autorë Arbër Ahmetaj dhe Sefedin Krasniqi. Ngjarje të ngjashme, të kësaj natyre, përgjatë luftës dhe pas saj, janë të bollshme.
Historia më e re e Kosovës, duhet domosdo të rishikohet, madje deri në rishkrim, sepse është rrastë e falsifikuar, siç e kanë pranuar edhe të akuzuarit për krime lufte dhe krime kundër njerëzimit, nga Gjykata Speciale e Kosovës, me seli në Hagë. Disa zyrtarë të lartë dhe eksponentë të tjerë të PAN-it, ngulmojnë të mos rishkruhet historia e Kosovës.
Por, referuar falsifikimeve groteske faktike të bëra, një pjese të historisë së re dhe tërësisht të historisë të sotme, rishkrimi do të jetë i pashmangshëm. Kjo ka ndodhur në Shqipëri, pas rishkrimit të historisë, “tradhtarët” e djeshëm, të shpallur nga filo-sllavi Enver Hoxha, me stalinistët e tij, sot janë atdhetarë të shquar dhe Heronj të nderuar të popullit shqiptar.
