Peter Sorensen do t’i japë shtysë dialogut Kosovë-Serbi
Gani I. Mehmeti
Që të mos mbesim me shpresa të thyera dhe të zhgënjyer si në të kaluarën nga bisedimet Kosovë – Serbi, duhet të jini i qartë, z. Sorensen. Ju vini nga një shtet mik dhe që e ka njohur Pavarësinë e Kosovës, prandaj, në bisedimet mes këtyre dy shteteve, duhet t’ia thuash në sy Vuçiqit se Kosova është e pavarur nga Serbia, se Kosova është një dhe e tillë do të mbetet, se edhe veriu i Kosovës – është i Kosovës. Krejt kjo duhet t’i thuhet Vuçiqit në mënyrë që ai ta kuptojë këtë, ani që e ka të qartë, por që nuk do ta kuptojë, sepse të gjitha që i bën Vuçiqi, i bën për pushtimin e veriut të Kosovës e jo për serbët e Kosovës, siç shprehet ai.
Po ta kishte për të mirën e serbëve të Kosovës, ai do e pranonte Pavarësinë e Kosovës dhe serbët do të integroheshin në institucionet e Kosovës dhe do të ishin të lirë si qytetarë të barabartë me të gjithë të tjerët.
Të gjitha lojërat Vuçiqi i bën përmes Listes Serbe në Kosovë, duke u përpjekur ta destabilizojë Kosovën dhe rajonin e Ballkanit në përgjithësi.
Vuçiqi e di se Kosova nuk ka qenë serbe asnjëherë. Ai e di mirë se, edhe e gjithë Serbia e sotme është në tokat shqiptare, duke i fituar ato përmes luftërave kundër shqiptarëve, me ndihmën e Eurpës dhe të vetë Perandorisë Osmane e në dëm të shqiptarëve.
Disa herë Vuçiqi e ka përsëritur se askush nu i ka thënë për Kosovën se është shtet! Po, sepse Lajçak e Borell sikur ishin në anën e Serbisë gjatë gjithë kohës sa ishin ndërmjetësues të nisedimeve mes Kosovës e Serbisë.
Prandaj, kjo duhet t’i thuhet vazhdimisht Vuçiqit, deri sa ai ta kuptojë mirë edhe kur nuk don ta kuptojë, se Kosova është shtet i lirë dhe i pavarur.
E se, sa më shumë e më shpejt t’i thuhet, besoj se një ditë do të pajtohet edhe Vuçiqi me realitetin . Tani ky nuk është realitet i ri, sepse nga fundi i luftës mes Kosovës e NATO-s me Serbinë ka përfunduar tani e 26 vite dhe ka 17 vite nga shpallja e Pavarësisë së Kosovës. Kjo nuk është një kohë e shkurtë.
