SHBA duhet të jetë më e qartë me popullin më proamerikan në botë.
___
Pezullimi i Dialogut Strategjik mes SHBA-së dhe Kosovës është një sinjal i rëndësishëm politik. Por mënyra si është bërë – pa shpjegime të detajuara për arsyet konkrete – e ka lënë hapësirë për mjegull dhe për propagandë të dyanshme. Një pjesë e opinionit mendon se qeveria është antiamerikane, ndërsa një pjesë tjetër dyshon se SHBA po pozicionohet pranë Serbisë.
Kjo situatë bëhet edhe më e ndërlikuar kur shohim se Lista Serbe, Serbia zyrtare, Gjykata Kushtetuese, madje edhe shumica e mediave në Kosovë (të cilat shpesh nuk janë rentabile pa mbështetje të jashtme), janë në sinkron kundër qeverisë Kurti – ndërkohë që shumica e qytetarëve të Kosovës e mbështesin atë. Ky kontrast nxit pyetje të natyrshme: pse SHBA pezullon dialogun, kur armiqtë e Kosovës janë ata që festojnë një vendim të tillë?
Populli shqiptar, më proamerikani në botë, meriton qartësi. Nëse ka fakte se qeveria Kurti nuk po i shërben interesit të Kosovës, ato duhet të bëhen publike. Nëse jo, është e rëndësishme që SHBA të japë një arsye të qartë pse ka marrë këtë hap, për të mos i lënë hapësirë manipulimit mediatik. Qartësia është respekti më i madh që mund t’i bëhet një populli që ka qëndruar gjithmonë krah Shteteve të Bashkuara.
