Zoti Tërnava, ju nuk e përfaqësoni popullin e Kosovës!
Së pari, një sqarim elementar: si kryetar i Bashkësisë Islame të Kosovës, ju përfaqësoni një institucion fetar dhe jo popullin e Kosovës. Prandaj, mos iu drejtoni qytetarëve sikur të flisni në emër të tyre dhe mos e paraqitni BIK-un si sinonim të shoqërisë kosovare.
Askush nuk po sulmon besimin islam dhe askush nuk po kërkon t’ia mohojë askujt të drejtën e besimit. Ajo që po kundërshtohet janë elementet antikombëtare, politike dhe antikushtetuese që mund të fshihen pas institucioneve fetare dhe ndaj të cilave BIK-u, nën drejtimin tuaj, ka pasur përgjegjësi të drejtpërdrejtë të reagojë.
Ju flisni sot për “përçarje”, “denigrim” dhe “bashkëjetesë”. Por ku ishte ky diskurs në vitet 2012–2014, kur qindra të rinj nga Kosova u nisën drejt Sirisë për t’iu bashkuar një lufte terroriste?
Atëherë nuk mjaftonte të dënonit individë të caktuar. Duhej të shihnit edhe përgjegjësinë institucionale dhe ideologjike që krijonte terrenin për atë radikalizim.
Sot, në vend se të merreni me pyetjet që kanë ngritur dokumentet e publikuara, ju përpiqeni ta zhvendosni debatin te ata që po kërkojnë transparencë.
Kjo nuk është përgjigje. Kjo është shmangie.
Ju kërkoni të verifikohet autenticiteti i dokumentit “Top Secret”. Shumë mirë. Edhe ne kërkojmë të njëjtën gjë.
Por atëherë lind pyetja: ku janë faktet dhe dokumentet me të cilat BIK-u i demanton pretendimet e përmbajtura në të?
Nëse dokumenti është i falsifikuar, demantojeni me prova. Nëse pretendimet për financime, ndërtime, ndikime apo struktura të huaja janë të pavërteta, sillni dokumentacionin që i rrëzon ato. Nëse BIK-u nuk ka asnjë lidhje me ato që pretendohet, le t’ia dorëzojë Prokurorisë Speciale provat që e dëshmojnë këtë.
Por në deklaratën tuaj nuk pamë një gjë shumë të rëndësishme:
Nuk thatë se BIK-u dhe ju personalisht jeni të gatshëm të bashkëpunoni pa asnjë rezervë me Prokurorinë Speciale për të sqaruar çdo pretendim që lidhet me këtë dokument.
Përkundrazi, pjesa më e madhe e deklaratës suaj merret me ata që e publikojnë dhe komentojnë dokumentin.
Kjo është pikërisht ajo që e bën deklaratën tuaj të dyshimtë në aspektin politik.
Ju kërkoni të ndalen “fushatat”, por publikimi i një dokumenti që pretendohet se është gjetur në telefonin e një personi të akuzuar për spiunazh nuk mund të ndalet me deklarata politike. Nëse dokumenti është pjesë e një procedure hetimore, atëherë le të jetë Prokuroria dhe Gjykata ato që e përcaktojnë autenticitetin, rëndësinë dhe vlerën e tij provuese.
Dhe këtu qëndron thelbi:
Prokuroria nuk po e akuzon BIK-un për spiunazh. Po heton pretendimet që përmban dokumenti dhe rrethanat në të cilat ai ka ekzistuar dhe është përdorur.
Prandaj, mos e paraqitni çdo kritikë ndaj BIK-ut si “islamofobi”.
Kjo është një mënyrë e vjetër për t’i ikur debatit.
PO FLASIM EDHE PËR PËRGJEGJËSINË TUAJ POLITIKO-INSTITUCIONALE
Zoti Tërnava, a e keni pyetur ndonjëherë veten pse ka kaq shumë reagime ndaj BIK-ut?
A keni marrë masa ndaj zyrtarëve, imamëve apo figurave që sulmojnë vazhdimisht identitetin shqiptar?
A keni reaguar kur heronjtë shqiptarë etiketohen, kur flamuri kombëtar përbuzet, kur kultura shqiptare sulmohet dhe kur tradita kombëtare paraqitet si diçka e huaj apo e papranueshme?
A keni marrë masa ndaj atyre që përpiqen ta zëvendësojnë identitetin kombëtar shqiptar me një identitet fetar-politik?
Nëse jo, atëherë mos na flisni për përçarje.
Përçarjen nuk e krijojnë vetëm ata që kritikojnë.
Përçarje krijon edhe ai institucion që hesht kur anëtarët e tij sulmojnë identitetin kombëtar dhe pastaj del publikisht vetëm kur kritikohet vetë institucioni.
DHE PËR HISTORINË, ZOTI TËRNAVA?
Ju akuzoni organizata dhe individë se po ndërtojnë narrativë përçarëse.
Por çfarë narrativi keni ndërtuar ju vetë?
Ju jeni personi që në fjalimin tuaj në Mazgit të Obiliqit në vitin 2015 e keni paraqitur Sulltan Muratin në një kontekst heroizues.
Ne nuk kemi problem me historinë dhe as me faktin që dikush të ketë bindje fetare.
Problemi fillon atëherë kur figura të pushtuesve osmanë paraqiten në mënyrë që relativizon historinë kombëtare shqiptare dhe kur një narrativë fetare vendoset mbi narrativën kombëtare.
Shqiptarët nuk kanë nevojë të zgjedhin mes shqiptarisë dhe besimit. Por askush nuk ka të drejtë ta përdorë fenë për ta tjetërsuar shqiptarin.
PËR LIRINË FETARE: MOS E PËRDORNI SI MBROJTJE VETËM KUR JU KONVENON
Ju flisni për lirinë e fesë.
Edhe ne.
Por liria fetare nuk do të thotë liri për të vepruar jashtë ligjit.
Në Francë, që nga ligji i vitit 1905, parimi i laicitetit është i qartë: Republika garanton lirinë e ndërgjegjes dhe ushtrimin e lirë të kulteve, por marrëdhënia ndërmjet institucioneve publike dhe kulteve rregullohet me ligj.
Në Kosovë, gjithashtu, liria fetare është e garantuar, por asnjë institucion fetar nuk qëndron mbi Kushtetutën dhe ligjet e Republikës.
Prandaj, zoti Tërnava, pyetja është e thjeshtë:
A i nënshtrohet BIK-u plotësisht ligjeve të Republikës së Kosovës – po apo jo?
Sepse kur flasim për institucione edukative, financime publike, konkurrencë, standarde arsimore, inspektim dhe veprimtari ekonomike, nuk ekziston ndonjë “zonë fetare” jashtë shtetit.
Edhe çështja e institucioneve si i ashtuquajturi Institut Hallall duhet të jetë transparente dhe e kontrollueshme sipas ligjit. Nëse ka respektim të ligjit, nuk ka arsye për frikë nga inspektimi dhe transparenca.
E njëjta vlen edhe për aktivitetet edukative të organizuara nga xhamitë dhe strukturat e BIK-ut me fëmijë.
Fëmijët nuk janë territor jashtë kontrollit të shtetit.
Zoti Tërnava, mos e ktheni kritikën ndaj BIK-ut në luftë kundër islamit.
Ne po kritikojmë islamin politik, radikalizimin, tjetërsimin kulturor dhe çdo përpjekje për ta vendosur identitetin fetar mbi identitetin kombëtar dhe shtetin kushtetues.
Nëse dokumenti “Top Secret” është fals, demantojeni me prova.
Nëse pretendimet për financime dhe ndikime të huaja janë të pavërteta, publikoni dokumentet që i rrëzojnë.
Nëse BIK-u nuk ka asgjë për të fshehur, hapini dyert Prokurorisë Speciale dhe institucioneve kompetente.
Nëse keni prova që dokumenti është i fabrikuar, dorëzojini në Prokurori.
Kjo është mënyra institucionale.
Jo deklaratat politike.
Dhe mbi të gjitha, mos kërkoni heshtje nga ata që bëjnë pyetje.
Në një Republikë demokratike, as BIK-u, as myftiu, as hoxha dhe asnjë institucion fetar nuk është mbi pyetjet e qytetarëve.
Ne nuk kemi frikë nga feja.
Ne kemi problem me politikën që fshihet pas fesë.
Nuk kemi problem me myslimanët shqiptarë.
Kemi problem me çdo ideologji që përpiqet ta bëjë shqiptarin më pak shqiptar.
Dhe këtë debat nuk do ta ndalë asnjë deklaratë e Myftiut.
Sepse shqiptaria nuk ka nevojë për leje nga askush.
Në fund a duhet populli të i besoj shtetit a juve?
