Zeqir Bekolli, shkrimtar, Drenas
Në Drenas, dje, u mbajt Sofra Poetike “Ymer Elshani”. Edhe kësaj here bashkë organizatorë ishin Drejtoria Komunale për Kulturë Rini e Sport e Komunës së Drenasit dhe Karavani i Shkrimtarëve për Fëmijë “Agim Deva” nga Kryeqyteti. Rrodhi si rrodhi ky manifestim tradicional, që nuk kishte ndonjë dallim nga të tjerët, por për befasinë e të pranishmëve, sidomos për gjeneratën e vjetër, në panelin e këtij organizimi u pa Anton N. BERISHA, dikur punonjës i Institutit Albanologjik, që foli për librat e rinj të poetit martir Mr. Ymer Elshani. Edhe pse sipërfaqësisht preku disa vargje të Ymerit, ai u prezantua edhe si seleksionues i dy veprave të hershme të Ymerit, në mesin e të cilave edhe i romanit të tij “Ndodhitë e Hundëkarrotës”. Kjo më befasoi dhe me shqetësoi njëkohësisht kur pashë dyfytyrësinë dhe “guximin” e tij për të ardhur në Drenicë dhe për të folur pikërisht për romanin për të cilën e kishte sulmuar shkrimtarin Ymer, për ndikim nga literatura e huaj, që aso kohe një kualifikim i tillë ishte me rrezik për poetin , dhe të tillin e bënte vetëm policia informative e sistemit totalitar, që i ndiqte krijuesit dhe veprimtaritë e tyre. Si sot më kujtohet se kjo polemikë pat zgjatur bukur shumë dhe si e tillë kishte pasoja për shkrimtarin Elshani, që e shpinte në binarët e anatemimit.
Por është një përparësi që gjërat që shkruhen, mbesin bashkë me kujtesën, kurse dëshmia e tij sot ekziston.
Mendoj se një vërejtje edhe kësaj radhe duhet t’i bëhet edhe bashkëorganizatorit DKRS-së në Drenas e cila po injoron kuadrot vendore dhe po angazhon individë si në rastin e Berishajt, i cili e ndoqi shkrimtarin Ymer, e dje erdhi për t’a shpërlarë turpin e hershëm, në raport me shkrimtarin Elshani dhe për këtë nuk u skuq fare, madje as që kërkoi falje!
