Gani I. Mehmeti
Kishin zënë ujkun një ditë. Kishin thirrur hoxhën dhe po përpiqeshin t’ia mësonin kuleuzin ujkut. Mirëpo, sa herë vinte tek fjala «kuleuzi» që duhej ta thoshte ujku, ai, me mendjen tek qingji thoshte «kingjuzi»!
Kështu edhe Stano, gjatë gjithë kohës së tij si «ndërmjetësues» kurrë nuk u mor me kërkesat që duhej plotësuar Serbia, vetëm me Asociacionin, sa i është ngulitur në kokë, duke e përsëritur çdo herë, sa i është bërë refren. Me gjasë, me mendjen tek asociacioni i komunave me shumicë serbe në Kosovë, është edhe duke fjetur.
Stano: «BE dëshiron të kujtojë se themelimi i Asociacionit është obligim i paplotësuar i Kosovës»! (Kosova Sot Online, 4. 11. 2024)
Vallë, a ka edhe Serbia obligimet e saja ndaj Kosovës, që Stano nuk merret fare me to? Të dy palët kanë pranuar Marrëveshjet e Brukselit dhe të Ohrit të vitit 2023, jo vetëm Kosova. Mirëpo, Stanos, diçka nuk po ia ka ënda fare të sillet kah Serbia!
