„Nuk ka këtu as katolikë as muslimanë, ka njerëz të pafajshëm“, „Kurrë e përjetë nuk i ndaj, këtu jemi të gjithë shqiptarë!“ „Pushkatomni më së pari mua me krejt stafin këtu, atëherë mundeni me i prek këta!“
Ky ishte heroizmi dhe sakrifica e Dom Kelmend Spaqit, meshtarit katolik të famullise së Gllogjanit në Prillin e vitit 1999 kur forcat policore e ushtarake të Serbisë donin të hynin në oborrin e Kishës së „Shna Naout“ në Gllogjan të Pejës, ku ishin strehuar e kërkonin mbrojtje mbi 4 mijë të përndjekur nga Drenica e zonat përreth kësaj Kishe.
Me këtë heroizmin të rrallë gjatë luftës në Kosovë Dom Kelmend Spaqi kishte arritur, jo vetëm të #shpëtojë mbi #4mijë të strehuarin në Kishë dhe në fshatin Gllogjan, por edhe të përkujdeset për të plagosurit e në fshatrat përreth si në Nepole, Jabllanicë (Shqiponjë) etj. E mbi të tjerat të përkujdeset edhe për ditët e shenjta të besimtarëve muslimanë të strehuar aty, që të kryejnë si duhet obligimet fetare të Ramazanit dhe Bajramit, gjatë muajit Prill 1999, si një shembull unik, i cili me siguri ka zënë vend në historinë tonë kombëtare, si shembull i bashkëjetesës ndërfetare në harmoni të veçantë dhe si model për botën ndërkombëtare: https://www.youtube.com/watch?v=IcjIjZjSzXU
Kjo sepse Dom Kelmend Spaqi gjatë jetës së tij (1962–2026) është shquar jo vetëm për shërbimin e tij të devotshëm si meshtar, por edhe për përkushtimin e tij kombëtar sipas mësimeve të At Gjergj Fishtës: „Ne kemi Bajram dhe Pashkë, po Shqiptarinë e kemi bashkë“, të cilat mësime i mishëroi gjatë ditëve më të vështura të historisë sonë të re kombëtare, luftës gjenocidiale të Serbisë në Kosovë në vitet 1998-99!
Kështu Dom Kelmend Spaqi u ba jo vetëm dëshmitar i kohës, por edhe pishtar i jetës vëllazërore për qindra/mijëra dëshmitarë të heroizmit të tij, për të gjithë qytetarët e Kosovës dhe gjithë shqiptarët e kohës – historisë sonë të patjetërsuar.
Heroizëm e përkushtim që me jep krenari e pikëllim sot, kur mora lajmin e dhimbshëm se Dom Kelmendi ka ndërruar jetë, dritë pastë shiprti i tij.
Krenari që sot më bëri të propozojë që Presidentja Vjosa Osmani ta dekorojë post mortum Dom Kelmend Spaqin; (1) me Medaljen e Shërbimit – për shërbim të dalluar ndaj shtetit dhe shoqërisë, ose (2) me Medaljen për Trimëri – për akte individuale të guximit.
Varrimi i të ndjerit Dom Kelmend Spaqi bëhet më datën 6 prill në orën 11.00 në Kishën e Velezhës, fakt ky që do të thotë se kur dikush varroset në një kishë, paraqet një vlerësim e nderim të madh nga Kisha Katolike, pasi që për këso vendime merret leje nga Vatikani.
Në këtë kuptim e drejtim nderimi e dekorimi i Dom Kelmend Spaqit merrë kuptim e mirënjohjes vëllazërore dhe më të gjërë.
Duke mirëpritur përkrahjen e propozimit e procedimin e tij, falemnderoj paraprakisht dhe uroj gjithë të mirat.
Me respekt,
Vjenë, 2 prill 2026
